廣東話旅遊資訊
今日同大家延續釜山嘅Lego屋嘅旅程
首先係草梁故事路
名稱：Choryang Ibagu-gil／초량 이바구길／草梁故事路
地址：49 Choryangsang-ro, Dong-gu, Busan, South Korea（起點）
我所指嘅Lego屋係喺Yeongju-dong區，我落咗「草梁故事路」呢個名原因係我嗰日係由呢度出發。其實釜山係有好多Lego屋嘅，之前所講嘅金川文化村同埋呢個Yeongju-dong只係其中兩個。
由草梁故事路一直向西北方向看上去，行到168階梯。係，真係有168級樓梯，我數過。呢條路線係釜山東區嘅主題步道，包含歷史同埋水彩，可以睇到隨住時間變化而改變嘅風景同人嘅痕跡。
日帝時代開設嘅國內首家現代綜合醫院，就係「舊百濟醫院」。您可以隨著時間變化，欣賞唔同模樣嘅「圍牆畫廊」。另外，草梁小學嘅圍牆展現咗東區人物史。仲有，為咗紀念天才詩人金敏夫，設立咗「金敏夫睇景台」。最後係匯集山坡道上居民生活同埋地區文化嘅「伊巴工作坊」Ebagu Crafts Workshop。
我嗰日仲繼續行埋過去一個行車轉角位嘅Diorama of history／역사의 디오라마，係一個觀景台。跟住再行埋過去「天空之眼 展望台」／영주 하늘눈 전망대。呢個觀景台睇嘅景係最靚嘅。
沿途你仲可以試下韓國人記憶中嘅飯盒連湯，仲有機會試吓傳統糯米糍同埋海鮮煎餅。攞住嘢食行街，每條街道都有啱影相嘅壁畫同細小嘅物件，而且海景同埋巷仔風景都好靚，所以吸引唔少遊客嚟到呢度。
我整Lego屋系列嘅原因係原來我發現佢嘅來源係「難民」，係度要講一講Lego屋嘅歷史。
韓戰同釜山嘅山村。當韓半島係1945年由日本解放嗰陣，釜山嘅人口約有30萬。有超過10萬名韓國人透過釜山港返嚟，而解放後住喺釜山，令當地人口大幅增加。韓戰爆發後，全國各地嘅難民湧入釜山，因為佢係距離戰爭最遠嘅地方。咁就導致喺1951年嘅韓戰高峰時期，釜山嘅人口幾乎達到84萬。
韓戰之前，城市嘅社會基建，包括居住區、供水同污水系統，係為30萬人嘅規模設計嘅，而呢個數字係日本佔領期間嘅人口。韓戰爆發後，釜山並唔準備好迎接數十萬嘅難民。
咁難民同Lego屋又有乜嘢關係呢？我地下回分解。
請支持我：
買件T-shirt👉https://storeAN.redbubble.com
睇個video👉https://www.youtube.com/channel/UCf3bmlDtj4yDQqFxzcOZVyw
0 意見:
Post a Comment