新聞報道：《公教報》疑「河蟹」專欄文章 內容涉批評港府、警隊
事件焦點明顯係公教報作為傳媒自我審查。公教報係天主教香港教區對外宣傳機器，不容異己，不足為奇。所以，事件除咗係總編輯嘅問題，更加係教區嘅問題：唔想得罪政權。呢個結果亦都係一啲都唔意外。
正委呢次刊登嘅文章係以周子諾事件講人命何價，溫和非常。或者大家可以將焦點放喺天主教香港教區嘅轄下的天主教正義和平委員會。正委會一直有明確宗旨帶領教友關心弱勢、倡議公義政策嘅角色。自從2014年雨傘運動以嚟，正委會漸趨低調靜態，比起多年前嘅先知角色的確式微，當中原因複雜異常，有可能係：委員職員意識形態跟不上社會變遷、熱血職員到咗收成期渴望安穩、組織出現不公義而產生勞資糾紛、教區為咗維穩安插委員或職員進行換血、外間政權進入組織進行滲透......
其實，細心觀察一下，天主教香港教區轄下嘅對外嘅組織喺呢幾年內都有類似情況。呢一個趨勢似乎不可逆轉，但係，作為當中嘅委員或職員（未被滲透嗰啲），真係要諗下初心，係要退休樂園？定係仲有一點火種？如果每個人都好似《逆權公民》入面嘅公民（包括香港嘅神職人員），攞出確定嘅良心，做好自己嘅專業角色本份，咁就相當足夠，咁就足以將寫得相當漂亮前衛嘅天主教社會訓導生活出嚟。信仰係要生活貼地！
0 意見:
Post a Comment