【流浪世代】Vietnam Con Dao Island／Con Son Island崑崙島／崑島／惡島

終於有時間剪返條旅行片😅記得訂閱我頻道呀😄

今次行陸路，喺胡志明市嘅Bến xe Miền Tây搭通宵長途巴士去Tran de port。 午夜12時開出，全程要5個幾鐘。 所有座位都係臥舖，分上下格。 都幾難頂，不過就體驗到當地人嘅生活。 上巴士時好似游泳池咁要用兩個套包住對鞋上去，中途大約三點鐘，就會去到中途站Minh Phat 2 Canteen食嘢。

一齊搭長途車嘅三個越南後生仔喺總站落咗車，休息緊，食緊rice cake。左手邊嗰個做髮型師，另外嗰兩個係做化妝師，仲有一個女仔唔肯出鏡，係sales。

到達Tran de port大約6點，喺停車舖頭休息日個幾鐘頭，就行去碼頭，搭 superdong high speed boat去崑島。8點開船。 第二朝食完早餐就去咗對住碼頭914嘅Công viên Tôn Đức Thắng公園，係一個紀念公園。 據說當年有914人為咗幫法國殖民者修建碼頭而勞累致死，一個小小嘅碼頭會有914個人死咗，簡直係匪夷所思。 呢個亦都預示咗殖同埋被殖， 反殖同埋鎮壓反殖之間嘅權力關係，亦都睇到越南人嗰一種嘅堅毅不屈，不卑不亢嘅精神。

崑島縣包括十六個大小島嶼，面積係76平方公里，以崑島為最大，面積係51.52平方公里，亦係集中最多戶人嘅地方。 崑島除咗國家公園入面嘅古樹林、檳榔林同南竹林，仲有三種珍奇動物，分別係玳瑁、儒艮同埋金龜， 好多人都特登喺呢幾個月份嚟睇金龜生蛋。 除咗自然風景，崑島亦留低咗好多文化歷史遺產，尤其係革命歷史遺迹，就好似今日晏啲會去嘅嘅崑島監獄。

今日一早去行山，就係去行崑島國家公園。崑島國家公園包括14個島嶼，喺1984年開始已經係受保護，崑島國家公園係越南7個國家公園之中唯一一個除咗樹林，仲包括埋海域嘅保護。聽講呢一個國家公園入面有成千種樹木，其中44個種類係第一次喺崑島發現，而當中有11個品種係有生物學家以崑島命名。除咗植物，崑島最出名嘅動物就係海龜🐢，好多人特登嚟 睇海龜生蛋。

今日入咗國家公園去咗兩個沙灘， 總共行咗六個鐘。過程中有一個亮點，就係見到一個路牌寫著“越南古樹600米”，愛冒險嘅我就走咗入去 😏冇路😮蕩失路😥 跟住喺度諗，冇網絡，冇GPS，越行越入，唔知會行去邊，大鑊了😭......新聞報道：一名香港男子喺崑島失蹤多日，下落不明......手忙腳亂，四處奔走，手腳損曬🤕，只有祈禱 🙏 突然有番少少網絡，知道我嘅方向，就向住起點嘅方向係咁披荊斬棘😵......終於用咗半個鐘頭出番大路。激動感恩😇呢個路牌我好記得佢㗎！不要讓我們陷於誘惑，正確啲咁講，應該係，不要自己陷自己於誘惑🙄

鍾意行山嘅朋友，崑島係一個好好嘅地方😎

尋日過左一日行山，今日轉咗畫面，去咗崑島嘅墓地，有唔少人去拜祭嗰啲死喺監獄嘅英雄烈士。 除咗墓地，喺路邊嗰啲嘅紀念碑都有人特登嚟停低架車裝香拜祭，紀念佢哋心目中嘅勇士。跟住下晝去咗崑島嘅兩個博物館，一個係圖片加實物，一個係監獄現場。

崑島又叫惡魔島，因為喺1861年，法國殖民政府為咗要打壓一啲反殖民嘅異見分子，就喺崑島嗰度起咗一個 有120個監倉嘅監獄。 大監倉入面四面會有一條好長嘅鐵通，穿著好多腳扣，鎖住監犯嘅腳，好少時間先能夠出嚟鬆一鬆，所以監獄入面嘅情況非常惡劣。最出名嘅就係佔地5.475平方米的「虎籠」(Chuồng Cọp)， 活生生咁曬住，獄卒就隨時都會用鐵支喺度撩嗰啲監犯，或者抌啲嘢落去，非常唔人道。 根據資料，有啲女監犯為咗表示抗議， 挖開自己個肚，攞啲腸出嚟，撻係啲獄卒個身上面， 以死相搏！

當中我最深刻嘅就係一個少女，叫武氏六(Võ Thị Sáu)， 佢十四歲嘅時候就已經係一個反殖民地嘅游擊隊戰士。16歲左右，佢因為用手榴彈刺殺當時一個壓榨人民嘅法國殖民官員而被捕，佢未滿18歲但仍被宣判死刑。為咗怕有人反彈，當局後嚟就將佢送到崑島避人耳目，將佢監禁。1952年，佢係島上被處決，死嘅時候年僅19歲。越南而家視佢為一個愛國烈士， 亦都係革命精神唧象徵人物之一。

19歲嘅時候，我哋做緊啲乜呢？

餐廳介紹，係Villa Maison Kitchen & Wine Bar叫左Maison's Beef Burger: New Zealand minced beef w/emmental cheese, bascon, onion, tomatoes, potato chips & dip of the day。自己一個咁樣喺度食lunch我都係第一次😅hea咗三粒鐘，世界好似停頓咗，空間永遠唔理會時間......除咗食物美味， Villa Maison Kitchen & Wine Bar 嘅擺設都好有心思！ 更重要嘅就係佢啲職員非常親切有禮貌！

喺崑島最後一日都係坐船再轉接駁巴士5粒鐘頭出返嚟胡志明市。旅行搭公交，雖然嘥唔少時間，但係當中遇到大大小小嘅好人好事，都係好值得回味😊例如喺船上問當地人一陣點樣買巴士飛去胡志明市，雞同鴨講，盡顯google translate嘅低能，最後有個大姐挺身而出，「一陣你跟住我啦😎」 一句說話， 暖在心頭 😂 ......去到碼頭，船員話我喺網上印出嚟張飛要轉返張真飛，要我烈日當空拖住個喼行返去碼頭尾間寫字樓🙄跟住有個阿叔二話不說，遞個頭盔畀我，送埋架電單車畀我，叫我自己走一轉，因為佢唔得閒要喺碼頭賣衫。喂大佬！ 兩個轆我唔掂㗎喎😲 會飛車落海喎！對大叔，我由衷感激😍 對大姐，我感激流涕😂......巴士似雪房，我見到頭先嗰個仗義大姐帶曬口罩，病病地，我就畀佢我件風褸冚一冚。呢個世界，互相幫忙，唔會太計較 😄 崑島，大概有5000人喺度生活，慢活🚶當中有唔少軍人進駐，hea駐。冇夜生活，呢幾晚耐唔耐會聽到全市嘅叫喊聲或者噓聲，原來唔少居民擔凳仔坐曬喺咖啡店同埋係商戶內外，係越南鬥韓國。世界工業，無孔不入。

崑島，除咗行山、探監、浮潛、睇龜之外，當中都有其他嘅民間故事。例如著明法國作曲家Camille Saint-Saens喺1895年响崑島完成嘅歌劇Brunhilda之後，就住咗喺崑島一段時間，故居就係現時碼頭914隔離嘅Con Son cafe。 另外，除咗前日所講嘅革命女英雄之外， 崑島居民會歌頌另一位女性，就係Lady Phi Yen， 佢係當年Nguyen Emperor Gia Long皇帝21個老婆其中一個，當時人民做反，國王一家逃亡去到崑島，皇帝寫信去法國要求增援助鎮壓人民。皇后就力諫不果，後畀皇帝冷待收監。皇帝離開之後，有一隻老虎同埋一隻猿猴將皇后從監獄救出，佢就係崑島終老。 人民為咗紀念佢愛民如子，就起咗一個 Lady Phi Yen Temple紀念佢。崑島故事果然有一定嘅魅力☺

崑島， 由惡島變成旅點，其中一個原因可能係Brad Pitt同佢當時嘅老婆Angelina Jolie喺2011年嚟過，之後開始多人知道崑島。 佢哋當然係入住島上唯一一間五星級酒店Six Senses Hotels Resorts Spas。 中文譯做六善，但係擺到明佢係講緊六感，即係眼耳鼻舌身意。每晚4000幾蚊，呢啲感覺都好貴下😅點解咁貴？每間別墅所有嘅包裝袋都是用紙或玻璃做，房間自己有游泳池，間間别墅對住個私人海灘，隨時免費玩stand paddle board，職員仲會留意到啲海龜幾時生蛋就帶埋你去睇...... 唔好誤會，我當然冇入住😅我住嗰間200蚊有找😂 下次同老婆嚟先入住。 佢敢嚟我敢住(因為越南都幾邋遢！)，不過要儲錢先。幾時開始儲？bắt đầu từ nay，即係「不漏杜拉」，意思就係「由現在開始」😎 如果你喜歡我的影片，請按下「喜歡」和「訂閱」鍵，並「分享」出去。你的支持就是我創作的最大原動力！If you like my videos, please click 'like','subscribe', and share. Thank you very much!