倫敦塔橋＠故事

 

倫敦塔橋＠故事

The stories of Tower Bridge, London

London Bridge is falling down,

Falling down, falling down,

London Bridge is falling down,

My fair lady.

呢首歌可謂家傳戶曉，而廣東話亦有首《有隻雀仔跌落水》。但係，今次唔係介紹London Bridge，而係隔離嗰條Tower Bridge，當中嘅故事亦同London Bridge有關。

大橋結構

Tower Bridge係一座雙葉吊橋式嘅可動橋，跨越泰晤士河，連接Tower Hamlets區同Southwark區。佢係建於1886年至1894年間，目的係為咗緩解倫敦東面嘅道路交通，同時保持河道嘅通行。1894年6月30日，橋樑由威爾斯親王同威爾斯公主隆重開幕。

橋樑有兩個巨大嘅橋墩，支撐住塔樓同人行道，同埋超過11,000噸嘅鋼鐵，提供咗橋樑嘅框架。鋼架外覆著康沃爾花崗岩同波特蘭石，以保護底層嘅鋼結構，並使橋樑更加美觀。橋樑有一對玻璃覆蓋嘅人行道，連接住塔樓，提供咗城市嘅全景。人行道最初係設計為讓行人喺橋樑升起時仍然可以通行，但由於使用率低，佢哋喺1909年至1982年間關閉。

橋樑開合

你無聽錯，Tower Bridge係一條會打開嘅橋。

Photo by tadas-petrokas in unsplash

佢可以將佢嘅跳板升起至86度，方便河上交通通過。跳板由液壓系統操作，使用油同電力而唔係原始設計中嘅蒸汽驅動。原始嘅泵送引擎、蓄能器同鍋爐而家喺Tower Bridge嘅引擎室展出。該橋每年仍然升起約800次，主要係為咗遊船同海軍艦艇。

嚟咗英國一年，我揸車每日都經過，只係見過一次Tower Bridge橋樑開合，歷時大約半個鐘。封橋塞車，本地人司空見慣，遊客就興致勃勃。

死人洞

Photo from: https://www.atlasobscura.com/

另外，Tower Bridge其中一個故事係喺Tower Bridge北端下面嘅死人洞（Dead Man’s Hole）。呢個係一個維多利亞時代嘅設施，用嚟收集喺泰晤士河裡面漂浮嘅屍體。喺橋樑東面嘅岸邊，有一個圓形嘅洞口，可以通往一個小型嘅碼頭。喺呢度，一隊由Tower Bridge管理人員組成嘅水警會用鉤子將屍體拉上岸，然後放喺一個特別設計嘅棺材裡面，等待認領或埋葬。

Photo from: https://www.atlasobscura.com/

死人洞嘅存在反映咗泰晤士河嘅殘酷歷史。喺19世紀，河道係倫敦最重要嘅交通和貿易渠道，但都係最危險同污染嘅地方。好多人因為意外、自殺、謀殺或疾病而喺河裡面死去。有時，屍體會被河水沖走或被魚吃掉，有時就會被發現並送到死人洞。喺1888年至1894年間，Tower Bridge建造期間，就有至少50具屍體被發現。

而家，死人洞已經唔再使用，但仍然可以從橋樑上面睇到。佢係Tower Bridge嘅一個陰暗而又引人入勝嘅秘密。

買錯橋？

1965年，英國政府發現已經歷100多年風雨嘅倫敦橋London Bridge正係度非常緩慢咁下沉，陷入泰晤士河。今次真係London Bridge is falling down！咁呢條喺Tower Bridge隔離嘅London Bridge又同Tower Bridge有乜關係呢？

1965年，舊倫敦橋London Bridge。Photo from: Getty image

當時有人提議將條橋賣咗出去，同時又有人肯用100萬英鎊將條橋買去美國。如是者，一拍即合。買家係一位叫Robert Paxton McCulloch嘅美國人，佢當時認為架橋必須座落喺有大片水域嘅地方，佢於是搵到London Bridge落戶地，就係當時了無人煙嘅亞利桑那州的哈瓦蘇湖Lake Havasu。

Photo from BBC

Robert呢筆交易極為複雜。首先橋樑需要起喺河流上面，所以需要美國總統授權去挖一條運河，再說服咗16個反對呢個項目嘅環境保護團體，讓佢哋相信呢個項目唔會對環境造成破壞。古老的倫敦橋被拆解後，大約10600塊石墩乘船越過大西洋，穿過巴拿馬運河，又乘坐卡車陸路抵達哈瓦蘇湖。London bridge終於喺1968年9月23日，喺亞利桑那沙漠開幕重生。

Photo from: Getty image

問題出現嘞，究竟呢位百萬富翁Robert點解用咁多錢同埋心機買呢條平平無奇嘅橋呢？當時，有唔少傳媒都報導指出，Robert根本就係買錯咗橋，本來係想買極具歷史價值同埋華麗堂皇嘅Tower Bridge，但係就買錯咗一條平凡不過嘅London Bridge。Robert當然有回應指出，一睇就知Tower Bridge咁宏偉，係無可能搬得走。呢個笑話／留言一直傳頌至今。

隨想

為咗面子，平凡人出錯都會唔認，更何況係大富豪。正所謂「蛇咬都唔認」。

我係英國生活同埋工作咗一年多，工作上見過唔少本地人，得出嚟嘅結論係佢哋好少覺得自己做錯，就算斷正，就只有唔出聲，或者講No worry、No big deal等。

禪宗六祖惠能講過：「何謂懺悔？懺者終身不作，悔著知於前非。」

即係話，對自己嘅「前非」必須清楚明白，然後終身不作，咁樣先算得上係真正嘅懺悔。

問題嚟啦，自己嘅「前非」必須清楚明白其實一啲都唔容易，因為人有盲點。就算你無盲點，你對自己嘅「前非」清楚明白後，都唔代表你同意呢個所謂「前非」係一個真正嘅「非」。你可能認為係人哋嘅「非」，唔係你嘅「非」。即時你認為係你嘅「非」，亦唔代表你同意會終身不作。所以我認為「懺悔」呢個詞語只會喺禪宗入面講下，喺現實生活入面，其實係唔會出現，因為人畢竟係冥頑不靈嘅生物，人人都只係想做自己想做嘅嘢。

Do not do what you want, and then you may do what you like.

請支持我：

買件T-shirt👉https://storeAN.redbubble.com

買杯咖啡👉https://ko-fi.com/lawan

睇個video👉https://www.youtube.com/channel/UCf3bmlDtj4yDQqFxzcOZVyw

Continue

由教書佬到VAN仔佬

我呢啲半退休嘅老鬼想分享下嚟到英國打工嘅經歷。本來諗住唔做嘢，得閒到處遊歷，增廣見聞，原來係會悶嘅。所以我喺嚟咗英國兩個月後就試下搵工，睇下我呢啲老鬼有冇人請。我當然係唔會做番教書，只係想搵一啲唔使點用腦嘅工，打發下時間，兼且學下新嘢，所以主力搵一啲未做過嘅工。

我主要係喺Indeed搵，最初兩個月喺Kent，甚至去到英國最東邊嘅Margate玩。喺嗰度申請咗幾份carer嘅工，其中一間請我，過程係要用Microsoft Team視像面試，跟住去實體面試同埋Trial Shift（英國嘅Trial Shift有啲講明係有人工嘅），即係實戰一段時間。期間主要係觀察員工點樣照顧有特殊需要嘅成年人，我將要負責嘅係一位患咗癌症而有學習障礙嘅伯伯。呢位伯伯喺我Trial Shift嗰兩個鐘一直係坐係輪椅，一直流口水，不停用佢右邊衫就抹咀。性格關係，我當時心想要我8個鐘喺室內照顧伯伯，我應該做唔到，後來婉拒咗呢份照顧者嘅工作。

由於Kent嘅風比較大，太太想試下住近倫敦，所以就搬咗出嚟倫敦2區，有一間位於倫敦市嘅連鎖泰菜餐廳請咗我做Kitchen Porter，工作主要就係操作洗碗碟機、清潔廚房、切菜切葱。人工係9.6鎊，雖然人工只得最低工資，但係加埋Tips同埋Tronc（行內常用，按職級分配加一服務費等），夾埋都有11鎊一個鐘，算係唔錯。得閒嘅時候，同廚房非洲籍Line Chef、泰國籍Soul Chef、越南籍Front House、法國籍Head Chef甚至係經理傾下計，其實都幾開心。Head Chef甚至話會好快培訓我成為一個Chef，係培訓過程，我曾經炒過一碟Pad Thai做外賣。由於餐廳距離屋企遠，收工時間好晏，成11點幾，搭車返到屋企要一個鐘。另外都係困喺室內成8、9個鐘，唔係太識合，我做咗兩個星期就冇做。畢竟廚房嘅工作係一個嶄新嘅體驗，好嘅體驗。

由於我鍾意揸車，所以係Indeed主力搵揸車嘅工。跟著，我就搵到一份Packer ＆ Driver嘅工作，11.5磅一個鐘。工作範圍係揸㗎van仔去收集一啲好fragile嘅藝術品（畫作、雕塑、古董、樂器……），攞返工場重新加料包裝保護(bubble、bubble 再bubble，再度身整個cardboard box, 或者係wooden crate) ，類似視藝枓，要用平水尺、電鑽、電鋸等，再安排寄出去海外。我有香港2號牌，曾經揸過5.5噸貨車。換咗英國牌後，本來揸到3.5噸大Van，但係由於運送嘅物品貴重，公司保險要報Premium級別，要5年UK driving licence（招聘廣告又無講明！）所以唔俾我揸3.5噸大Van，只能夠揸電動細Van，主要入倫敦市（唔洗比Congestion Charge），同埋倫敦1至7區。我最開心嘅係可以去唔同嘅地方，見到靚景，就停低影下相。公司得8個人，聯合國，清一色男性，同事嚟自葡萄牙、西班牙、印度、保加利亞，老闆係意大利人。逢星期五收工前，老闆請飲啤酒（Happy Friday）。同事之間得閒吹下水，煲下煙，取笑一下英國人嘅口音，例如me讀成mai、刻意走晒t音等等。由於公司位置唔近tube同埋巴士站，好吊腳，行番工同搭車一樣都要一個鐘，再加上開始有啲悶，我做咗兩個月就辭咗工。老闆仲同我講唔鍾意新工嘅話，隨時返嚟幫手。運輸同包裝嘅工作同樣係一個嶄新嘅體驗，好嘅體驗。

喺番Packer ＆ Driver工前，其實已經有一間飲食業話請我，不過我做完一日Paid Trial Shift後發覺佢哋啱啱由大warehouse（連central kitchen)搬咗去細5倍嘅地方，環境狹窄、系統混亂，我婉拒咗老闆。事隔兩個月，離開Packer ＆ Driver工作，心想有關嘅系統應該有所改進，於是我再聯絡呢位老闆，佢一口應承，我諗飲食業流動性真係好大。我申請嘅係一份Delivery Driver嘅工作，12磅一個鐘，主要係由中央廚房同埋倉庫運送食物、飲品同埋用具去所屬餐廳同埋美食車。我仲同老闆講價，話請我呢啲有交帶同埋信得過嘅員工，起碼都13磅一個鐘啦！老闆二話不說就應承咗，仲話由於要justify呢個人工，將我個title改為Delivery Driver ＆ Assistant Manager。一個星期除咗兩日送貨，其他時間就去唔同嘅地點（美食車、預約好嘅辦公大樓午膳到會服務等）擺檔，仲有就係貨倉執貨、點貨、訂貨，同埋幫老闆綜合各餐廳、美食車嘅收入數據等等，簡單嚟講就係大打雜。而家已經做咗三個禮拜，暫時我都算鍾意呢份工，因為送貨都幾自由，同埋每日都有新嘢學習。公司有成40幾人，有部份係香港人，送貨時都會同佢哋吹下水。

我希望可以每份工都做兩三個月，接觸多啲唔同嘅嘢。我呢啲老鬼都搵到工，想同喺外地搵緊工嘅香港人共勉。

＃唔問唔知得唔得

＃唔試唔知啱唔啱

＃放膽同同事吹水

＃未返本行唔緊要

＃心理釋懷好重要

＃如水唔只係口號

＃要喺生活中嘗試

＃放下身段乜都試

＃BeWater

Continue

英國揸車去瑞士

 

分享下由英國揸車去瑞士嘅自駕遊。我哋係由倫敦出發，目的地係蘇黎世，全程跟住Google map行。純粹計車程，行收費路段要用10個半鐘頭，途中只會踩入法國國境。如果選擇非收費路段，就需要12個鐘，除咗法國，仲會途經比利時、盧森堡同埋德國。我哋選擇唔係途中過夜，直接去蘇黎世，所以選擇收費路段，雖然話車程係10個半鐘頭，但係要預多3個鐘。一個鐘係Euro Tunnel要早一個鐘check in，第二個鐘係瑞士同英國時差，瑞士快一個鐘；第三個鐘係預中途入油、休息同埋行錯路。聰明嘅你即刻會知回程可以預少啲時間。

由英國揸開車去歐洲嘅朋友都知道，歐洲各國對車輛嘅設備都有些少差異。由於係第一次，以防萬一，我盡量攞個最大公因數，準備包括UK sticker（磁石貼帖係車尾）、三角警告牌、headlamp converter（膠貼貼喺大燈左下方，避免光線睜到對頭嘅左軚駕駛者）、反光衣（按人頭計）、急救箱、Swiss motorway vignette sticker (喺近瑞士嘅油站／7仔買，40瑞郎，貼喺大銀幕，無限次上高速公路，每年二月起計，下年一月尾到期，一年有效，都幾抵）。除咗呢啲硬件，仲有帶埋英國車牌、V5牌簿同埋車保文件。以上準備嘅嘢喺整個旅程都冇俾人查過，但務必要準備，以防萬一。其實我都準備得唔係好充分，例如我冇買入瑞士城市（特別係日內瓦）嘅廢氣排放五色Stick'AIR stickers，貼喺大銀幕。特別一提，入去法國城市都需要呢種stickers，而喺法國買嘅stickers適用於瑞士，倒轉就唔得。

講完準備，講下途中注意事項。法國同埋瑞士嘅motorway都好好行，定時會有油站同埋補給站，而且會好早提醒你。你只需要提前轉定歐羅同埋瑞郎落你張multi currency card度，係法國同埋瑞士入油買嘢都暢通無阻。我用嘅係英國嘅虛銀debit card，香港或其他國家嘅就唔太清楚。入油方面，我見大部份油站都係pay at pump，有啲直頭有便利店嘅收銀都閂咗門，入油完全自助。雖然定時會有油站，但奉勸油缸少過半缸就去入滿佢，因為俄烏戰爭令到汽油供應仲係有啲緊張。我試過油缸剩低一格先搵油站，但冇諗過前邊幾個油站都收咗檔（售罄），要四處張羅，好彩最後搵到一間排晒長龍嘅油站！有驚無險。另外，雖然歐洲各地好似都冇立法規定落雪揸車一定要有雪鏈，但喺出發前要檢查好四條呔，同埋建議唔好喺12月至2月去，一來上山嘅纜車大多喺11月尾停駛，冇乜雪山睇；二來各地路面情況充滿未知數。就好似我哋今次由北向南，由蘇黎世（停兩晚），去Interlaken（停三晚），再去日內瓦（停三晚）之後，最後一日晨早回程，去法國嗰程係要經過連綿山脊，吹住大風，仲要落住雪，同埋晨咁早黑擝擝。相信喺冬天途徑嗰度應該幾難搞。

過境方面，法國同瑞士之間係冇人查，掂行掂過。問得最詳細嘅只係喺Euro Tunnel出境英國時，職員問咗兩條問題：一，去邊度？答去瑞士。二，放假？答係。回程時問多兩條問題：一，去咗邊？答瑞士。二，去咗幾多日？答9日。三，你哋有親友喺瑞士？答冇。四，瑞士有冇雪？答山上有，城市冇。記得每一次攞翻本護照時check下佢有冇抌印。

選擇交通同埋價錢方面，可行嘅交通包括飛機、火車、巴士、同埋自駕。相信飛機可能好平，因為內陸機唔少廉價機票，而且又慳時間。火車出咗名貴，除非你預好早去訂。巴士應該係最平，但時間最長。自駕要預入油費、Euro Tunnel費、去程法國motorway收兩次toll，分別係24.2同埋3.8歐羅，回程貴啲，分別係24.2同埋34.8歐羅。邊種交通工具較平就視乎你有幾多人一齊去。自駕有一種相對嘅自由自在嘅感覺，代價係準備幾多嘢同埋費神揸車，但係如果你好似我咁，鍾意揸車就另作別論。

最後係有關瑞士評語。貴係眾所周知嘅，但貴得嚟又真係冇乜啱食同埋冇乜特色嘅嘢食。所以嚟瑞士都係主要睇雪山。論山景小屋，我覺得法國小村莊啲山景小屋比較靚，因為較有色彩、藝術感同埋配埋風車。瑞士，一世人總要嚟一次，但一次就夠。

Continue