藝術教育堂

今日有兩班上藝術教育，我做咗個裝置活動。我畀十分鐘時間佢哋離開課室，喺全校任何地方搵一件代表自己嘅物件，然後擺放喺課室前方佢覺得適合同埋舒服嘅位置，然後解釋下點解揀呢件物件，有咩意義。當然以唔可以摧毀生命為原則，例如唔可以摘樹葉、捉昆蟲等，但係如果佢能夠捉到校長過嚟都冇問題😎 佢哋攞番嚟嘅嘢包羅萬有，包括有水珠嘅樹葉、垃圾桶蓋、防滑地牌、長凳、橄欖枝、童軍竹、DSE考生指示牌😲(學校借咗場地畀dsc考試㗎😌真係想打佢哋🤢)等等。

响芸芸解釋入面，有兩個比較深刻，第一個，佢搬咗個垃圾桶入嚟😬佢話佢乜都食，就係要用垃圾桶警醒自己，要注重健康同埋體型😆 第二個，佢揀咗一把彩虹七色雨傘，佢話人生只係得紅色同橙色比較鮮豔，比較開心，其他都比較幽暗，比較悲傷。佢希望自己喺唔開心嘅時候都能夠好似紅色同埋橙色咁，自強起嚟🖖

原來，女仔搬起嘢上嚟都幾狼死，成張長實木櫈都可以搬上嚟兩層樓😵

Continue

壓力+鼓勵=成長

獨自去茶餐廳食飯，坐正喺收碗碟盤嘅對面，茶餐廳阿姐好大力咁將啲碗碟飛入去個盤度，刺耳非常😒我同阿姐眼神對視咗三秒鐘😡 唔好誤會，唔係圖中呢個兇神惡煞嘅阿姐，另外一個阿姐先至係主角。我心諗，點樣對付佢好呢😕第二round，呀姐又嚟擺碗碟，佢今次細聲咗一啲，我對佢微笑，畀多個手指公佢讚好👍佢之後就好溫柔咁對待啲碗碟🤣。 正所謂一啖砂糖一啖屎，原來好有效😎

食完飯嘅第一堂係音樂堂，班主任幫學生點咗名之後，陸陸續續去到音樂室，用咗成8分鐘😤仲有學生未到😖我同同學講，最後入嚟嘅同學要唱歌🙃最後到嘅同學唔敢唱，我問全班同學，反對佢唱嘅請舉手🙋結果零票。佢好似好大壓力，都係唔敢唱😄跟住我同佢講，安sir今日生日喎，唱首生日歌嚟聽下😉喺同學掌聲鼓勵下，佢終於帶動全班用韓文唱咗首生日歌😍

原來壓力加埋鼓勵係可以有成長㗎😏

Continue

跌跌碰碰地成長

我只係教過男校，未教過男女校，同埋女校。今次代課教女校，開初有啲好奇女校嘅學習情況係點樣樣🤔。 喺中三堂上有個同學擘大雙腳，仲要un un腳！ 「你好似擔住支煙嗰啲豬肉佬咁樣un腳，唔該斯文啲！」 我語重心長同佢講。「豬肉切割員萬歲！」佢舉起右手🙋，用好輕鬆嘅語氣大聲講。無語......🤦

喺牛頭角街市隔離嘅地踎飛髮舖剪髮，阿姐邊剪邊喺我耳邊用超過90分貝嘅音量聲喊叫：「晴晴，唔好亂咁跑，坐喺度，唔係我就打死你！」 過咗一陣，晴晴走咗過嚟阿姐後面，同阿姐講：「我打返你就真！打你打你......」係嗰個時候，阿姐係揸住把剃刀喺我耳邊，我真係有啲驚囉😰

嚟到商場，見到有個後生仔企喺間舖頭入面整理眉毛，兩個店員服侍......

突然感覺到呢個世界好陌生😌 應該係話，呢個世界可能覺得我好陌生😅 每個人都係跌跌碰碰咁樣成長，成長後，就好快忘記嗰啲跌跌碰碰 係幾咁寶貴，幾咁值得回味😊

Continue

我看見的味道

尋日開始去一間中學代課，主力係倫理宗教科及宗教道德教育科，但同時要代初中嘅音樂同埋藝術教育科🙄。係藝術教育科入面，我畀中四嘅同學一個主題，就係「我看見的味道」，要同學用圖畫表達主題。原來地球上有少部份人係能夠睇見聲音、聞到顏色、聽到溫度等等聯合嘅感覺，叫聯覺(Synesthesia)。我希望同學能夠用唔同嘅感官去表達世界上唔同嘅嘢，隔離呢幅圖畫就係其中一個同學嘅作品，睇落去好有味道嘅感覺😋
人類了解未來有限，因為對人類本身嘅認知有限。第一次工業革命嘅蒸汽火車，第二次工業革命嘅電力發明，第三次工業革命嘅電腦互聯網， 以致現時好多人討論就嚟發生嘅第四次工業革命：人工智能、生物科技3D4D5D打印等等嘅技術融合。人類嘅將來相當詭秘，將來可能大部分人冇工作，出世就等死亡。人工智能取代人類已經講咗好多十年，應該好快實現！人類探索未來已經再唔能夠坐喺課室入面，要跨越嘅課本，跳出框框，思考人類嘅未來。我諗將來我哋真係能夠睇到人嚐到笑話、睇到溫暖、聽到陽光、聞到失業...... 唔按規則出牌，先至能夠贏過人工智能😎

Continue

貪

以下是我在fb曾經出過的舊文，也貼在這裏大家分享😎

最近見到一條題：基督徒可以賭博嗎？買六合彩同埋打麻雀可以嗎？

賭博係行為。 唔好講到咁廣義，人生就係賭博， 淨係講香港人最鍾意嘅買股票。買股票本身就肯定係賭博，買樓收租應該都算係賭博。 因為我相信冇一個人希望高買低賣 ， 買樓自住都走唔出呢個金律！ 除非你真係唔介意高買自住，低價放樓。講到呢到，應該有唔少人反對...... 問題核心應該係貪心。

貪心係心態。希望自己飛黃騰算唔算貪心？希望自己嘅仔女成為神童算唔算貪心？當然算。希望自己事業成功但無足夠能力，仍耗盡心力，不顧身心向上爬，搏一鋪，算唔算貪心？ 希望自己嘅仔女入名校，而佢哋又唔夠能力，仍耗盡心思，搬去名校區， 報讀慕道班入教，搏一鋪，算唔算貪心？呢啲心態喺你我身邊經常出現，貌似正常......

有說以小搏大先至唔應該，其他無所謂，唔屬於賭博。我認為有點自欺欺人。 我認為最緊要係認真自我反省，接受自己嘅貪心，接受人性，撇除一啲不必要同埋不合比例嘅貪心，就已經足夠。

天主教傳統講得好，信仰係走向聖化嘅旅途，唔好只著眼於一時一刻，要繼續努力，不斷反省，學會做人。

Continue

譚太今日又無嚟游水！

室內泳池游水。游完水喺更衣室見到兩位赤條條嘅伯伯傾緊計。
A伯：喂！今日遲咗？
B伯：係呀，頭先飲完茶，所以今日遲咗。你游完喇咩？
A伯：游完囉！今日仲游多咗兩個圈添，你呢？
B伯：我都啱啱游完。
A伯：我都走啦，譚太今日又冇嚟游水！......

之後喺更衣室門外，我又撞到B伯，佢同C伯講：「老譚真係陰公！老婆走咗兩個月，佢仲係好掛住佢......」

珍惜身邊錫你嘅人！

Continue

播獨？播毒！

昨天經過商務書局，聽到有位媽咪同個仔講，都叫你要讀書㗎啦😠，你要睇多啲書呀👿......(省略一千字)
眾所周知，香港嘅三聯、中華同埋商務書店都係唔同屬於一間母公司聯合出版集團。佢哋包攬晒出版、印刷、發行到零售整條產業線，壟斷咗本地約八成市場。 上邊如果一聲令下，佢哋可以封殺某一類嘅書或者係咁推另一類嘅書，影響你 嘅思想。呢三間書局日日軟性播毒，冇人知冇人理，原因好簡單，就係言論自由。世界人權宣言第十九條指出，人人有權享受主張和發表意見的自由；此項權利包括持有主張而不受干涉的自由，和通過任何媒介和不論國界尋求、接受和傳遞消息和思想的自由。如果內地官媒指戴耀廷喺台灣播獨成立，呢三間書局日日軟性播毒，特區政府更加必須首先盡快追究。
阿仔嘅媽咪，睇清楚咩書先好畀個仔讀喇，唔係係咁睇書就ok呀😅

Continue