髮．仔

太太剛剛剪咗髮，入門口時我冇第一時間作出反應，簡直係罪該萬死🤕 事件令我諗起早前喺中四級藝術教育堂中進行嘅電影欣賞，呢期我為佢哋選擇咗逆權公民。播放途中，有個女同學攞塊鏡出嚟係咁照，「夠靚啦😂唔使照啦！收埋塊鏡佢啦😑」「阿sir我剪咗新髮型呀😉」「係喎🙄爭啲唔認得你😅」佢仲未肯收埋塊鏡🤔，過咗兩秒，「阿sir，我剪咗呢個頭，全世界所有仔都係我嘅😎」我還以微笑😊 跟住佢繼續「阿sir，包括你！你都係我㗎😏」無語😶......如果佢呢種頂天立地豪邁奔放嘅性格，吸引到天下間嘅公民(特別係"仔")起來革命，改變呢個不濟嘅社會，咁都唔錯😅

Continue

撐基層 買文具

太太最近開始為一位基層的高中學生補習中文， 由於兒時專注力不足，他學習有所限制，成績不太好，另外由於家庭資源匱乏，沒有錢買書，所以很少看課外書。 他是衆多個來補習的學生中唯一一個第一次來我們家就懂得將他雙破舊鞋放在門外走廊，緊緊貼近牆邊，免得阻人，顯示他很懂得為人切想。 此外，太太問他會否肚餓，他不斷說不肚餓，中午吃了很多(當時其實已是晚上八時)😓，可看出他自幼「培養」了那份怕別人擔心的紀律。 孺子可教也👍
另一邊廂，太太亦有不少資源豐盛的學生，當中有不少欠學習動機、態度傲慢、欠禮貌的例子。😤世事無奈！起跑線的差異就造就了不同命運的學生。😕我們決定多關照資源匱乏的學生，甚至乎剔除那些沒有禮貌，沒有學習動機的，資源豐盛的學生。我記得我的恩師關俊棠神父曾經跟我說過，當教師就要專注兩類學生，第一類是最基層的，第二類是最富足的。前者要特別關顧，讓他們感到有人關心，萬事捱過來💪；後者要好好引導，因為他們會影響將來的社會。
太太今日到書局買些文具給那位基層學生， 我見他買給自己也從未如此落力😇

Continue

網絡的滾動

最近改過一份工作紙，係關於團體中的成長，有位同學喺王者榮耀嘅神臘會作戰嘅時候，隊友仗義相助，感動非常😂我睇完之後都滾動到非常😅網絡嘅滾動原來可以咁滚動......

Continue

藝術教育堂

今日有兩班上藝術教育，我做咗個裝置活動。我畀十分鐘時間佢哋離開課室，喺全校任何地方搵一件代表自己嘅物件，然後擺放喺課室前方佢覺得適合同埋舒服嘅位置，然後解釋下點解揀呢件物件，有咩意義。當然以唔可以摧毀生命為原則，例如唔可以摘樹葉、捉昆蟲等，但係如果佢能夠捉到校長過嚟都冇問題😎 佢哋攞番嚟嘅嘢包羅萬有，包括有水珠嘅樹葉、垃圾桶蓋、防滑地牌、長凳、橄欖枝、童軍竹、DSE考生指示牌😲(學校借咗場地畀dsc考試㗎😌真係想打佢哋🤢)等等。

响芸芸解釋入面，有兩個比較深刻，第一個，佢搬咗個垃圾桶入嚟😬佢話佢乜都食，就係要用垃圾桶警醒自己，要注重健康同埋體型😆 第二個，佢揀咗一把彩虹七色雨傘，佢話人生只係得紅色同橙色比較鮮豔，比較開心，其他都比較幽暗，比較悲傷。佢希望自己喺唔開心嘅時候都能夠好似紅色同埋橙色咁，自強起嚟🖖

原來，女仔搬起嘢上嚟都幾狼死，成張長實木櫈都可以搬上嚟兩層樓😵

Continue

壓力+鼓勵=成長

獨自去茶餐廳食飯，坐正喺收碗碟盤嘅對面，茶餐廳阿姐好大力咁將啲碗碟飛入去個盤度，刺耳非常😒我同阿姐眼神對視咗三秒鐘😡 唔好誤會，唔係圖中呢個兇神惡煞嘅阿姐，另外一個阿姐先至係主角。我心諗，點樣對付佢好呢😕第二round，呀姐又嚟擺碗碟，佢今次細聲咗一啲，我對佢微笑，畀多個手指公佢讚好👍佢之後就好溫柔咁對待啲碗碟🤣。 正所謂一啖砂糖一啖屎，原來好有效😎

食完飯嘅第一堂係音樂堂，班主任幫學生點咗名之後，陸陸續續去到音樂室，用咗成8分鐘😤仲有學生未到😖我同同學講，最後入嚟嘅同學要唱歌🙃最後到嘅同學唔敢唱，我問全班同學，反對佢唱嘅請舉手🙋結果零票。佢好似好大壓力，都係唔敢唱😄跟住我同佢講，安sir今日生日喎，唱首生日歌嚟聽下😉喺同學掌聲鼓勵下，佢終於帶動全班用韓文唱咗首生日歌😍

原來壓力加埋鼓勵係可以有成長㗎😏

Continue

跌跌碰碰地成長

我只係教過男校，未教過男女校，同埋女校。今次代課教女校，開初有啲好奇女校嘅學習情況係點樣樣🤔。 喺中三堂上有個同學擘大雙腳，仲要un un腳！ 「你好似擔住支煙嗰啲豬肉佬咁樣un腳，唔該斯文啲！」 我語重心長同佢講。「豬肉切割員萬歲！」佢舉起右手🙋，用好輕鬆嘅語氣大聲講。無語......🤦

喺牛頭角街市隔離嘅地踎飛髮舖剪髮，阿姐邊剪邊喺我耳邊用超過90分貝嘅音量聲喊叫：「晴晴，唔好亂咁跑，坐喺度，唔係我就打死你！」 過咗一陣，晴晴走咗過嚟阿姐後面，同阿姐講：「我打返你就真！打你打你......」係嗰個時候，阿姐係揸住把剃刀喺我耳邊，我真係有啲驚囉😰

嚟到商場，見到有個後生仔企喺間舖頭入面整理眉毛，兩個店員服侍......

突然感覺到呢個世界好陌生😌 應該係話，呢個世界可能覺得我好陌生😅 每個人都係跌跌碰碰咁樣成長，成長後，就好快忘記嗰啲跌跌碰碰 係幾咁寶貴，幾咁值得回味😊

Continue

我看見的味道

尋日開始去一間中學代課，主力係倫理宗教科及宗教道德教育科，但同時要代初中嘅音樂同埋藝術教育科🙄。係藝術教育科入面，我畀中四嘅同學一個主題，就係「我看見的味道」，要同學用圖畫表達主題。原來地球上有少部份人係能夠睇見聲音、聞到顏色、聽到溫度等等聯合嘅感覺，叫聯覺(Synesthesia)。我希望同學能夠用唔同嘅感官去表達世界上唔同嘅嘢，隔離呢幅圖畫就係其中一個同學嘅作品，睇落去好有味道嘅感覺😋
人類了解未來有限，因為對人類本身嘅認知有限。第一次工業革命嘅蒸汽火車，第二次工業革命嘅電力發明，第三次工業革命嘅電腦互聯網， 以致現時好多人討論就嚟發生嘅第四次工業革命：人工智能、生物科技3D4D5D打印等等嘅技術融合。人類嘅將來相當詭秘，將來可能大部分人冇工作，出世就等死亡。人工智能取代人類已經講咗好多十年，應該好快實現！人類探索未來已經再唔能夠坐喺課室入面，要跨越嘅課本，跳出框框，思考人類嘅未來。我諗將來我哋真係能夠睇到人嚐到笑話、睇到溫暖、聽到陽光、聞到失業...... 唔按規則出牌，先至能夠贏過人工智能😎

Continue