通識科改革再改革。十年多前，中途出家，入校教書，最初仲有一間中學同時請我，主教通識，兼教宗教倫理。記得當時我唔去嘅理由係334新學制，尤其係通識科，推行十年後，可能又再改革，心諗都係揀返一科我最鍾意教嘅，同埋穩陣啲嘅科目去教為上。最後都唔知自己教得好唔好，真係要問下啲學生先知。之後，雖然無教通識科，但都一直留意同參與社會發生嘅事，亦發現學校（可能其他學校都係）好重視通識科。新學制初期，由於未有足夠人力資源，唔少學校都積極「引導」其他科嘅教師轉教通識科，放重資源落去，其他科嘅老師都係好葡萄。當年被「引導」轉科嘅老師如今肯定一番滋味在心頭！有人辭官歸故里，有人漏夜趕科場。收起教鞭之後，我反而教過通識科，係私人補習嗰隻。發覺又幾好玩，教到學生好多嘢，特別係積極關心社會嘅嘢。通識科改革再改革，亦係意料中事，可以見到當權者嘅恐懼。傳媒訪問嘅學界，回應大多係小修小補，什麼加多個「達標並表現優異」等增加學生學習誘因，都係「榜著」政權嘅講法。無論通識科改成點，甚至消失，香港人喺呢一年半，集體上咗嘅一堂充滿血肉人性嘅通識課，歷歷在目，發夢都記得，呢一樣嘢，當權者係改革唔到。政權可以改革人民，人民更能改革政權，依靠嘅就係嗰一個夢。起碼我哋有發夢嘅權利同自由。Photo...
